Къаман проектех долча бартчӀоагӀамий 87% кулгаш яздаь да
Къаман проекташ йоаржаяра болх лакхача боараме дӀахьош ба тахан мехка. 3 млрд 602 млн сомах латта контракташ чӀоагӀъяьй. 2025-ча шерарча дерригача рузкъан тӀара 87% я уж. Кассови оагӀонцара болх дӀабахьар тахан 1 млрд 532 миллионага кхоачаш да, цох хул 37%. Россе юкъарча боарамга диллача, дикка дӀабодаш ба из болх вайцига.
«Экологи» яхача къаман проектага гӀолла 81,4% рузкъа дӀадахад, мехкара юкъара боарам 26,5%-тӀа латтача хана. Кхыйола проекташ йоаржаяр а иштта дика дӀадодаш да республике.
«ДӀаьха, кадай вахар» яхача программага гӀолла дӀадахар 55,8% ахча да (мехка - 39, 3%), хӀаьта «Саг чувоацаш, гӀетташ дола гӀирсаш» яхача проекте из гӀулакх 60,0% тӀа латт Россерча 31,2% духьала. ТӀехьа юсарех яц «Дезал», «Вахаре эшараш», «Туризм» яха проекташ а. Вай Мехкадас Келаматанаькъан Махьмуд-Ӏаьлас белгалдир, укх шера дӀаяхьа лерхӀача кхетаченаша наьха вахара хьал тоадарал совгӀа, дӀахо дӀайодача хана эша чӀоагӀа лард йолларгхиларах.
«Къаьстта йоккха терко лоаттаю оаха вахара оагӀонца дувзаденнарашта, экологеца, машинашца дувзаденнарашта. Наьха вахара хьал тоадара тӀехьа лоархӀаме моттиг дӀалоацаш йола оагӀонаш я уж», - аьлар вай Мехкадас, цу балхах дувцаш.
