«Ади Ахьмада» клуба спортсменаша Россе чемпионате толам баьккхар
«Ади Ахьмад» спортивни клуба шин спортсмена, студенташта юкъе дӏахьош хиннача Россе эллиной-румий латара чемпионате, шоаш дикача оагӏорахьара гойтар, яхаш, хоам бу «Сердало» газетага моттигерча спорта Министерствон зарбан болх лелабеча Гӏаппархой Аишас.
«Кхаь дийнахьа Москве дӏахьош хиннача яхьашка мехка дикагӏча вузашкара 350 совгӏа доакъашхо вар, 10 тайпарча дозалах латаш. Бӏарахой Исмаӏала юха а ший спорта говзал гойтар, 82 кг дозал дарашта юкъе дошо майдилг а студентий дунен чемпионате дакъа лаца бокъо а яьккхар цо, из дӏахьоргья Бразиле.
Шоллагӏча Гӏалгӏайчен викала - Бӏарахой Мухьмада борза совгӏат даьккхар 77 кг дозал дарашта юкъе», - аьлар хоамо.
«Уж майдилгаш боккхача къахьегама чаккхе я, берригача тренераша, вай спортсменаша цхьана дӏабихьа болх ба. Дунен чемпионате дакъа лаца йиш хилар - из шолханеца баьккха толам ба, хӏанз керттера декхар дикка къахьегар да, шоай мел йола таронаш чемпионате гойтаргйолаш.
Даькъалабувц вай кагирхой, цар тренераш!» - аьлар ГӏР спорта министра, Гӏалгӏай Республикан спортивни латара Федераце кулгалхочо Белхарой Руслана.
