«Из болам дӀахьоча юкъа, 800 совгӀа вола дешархо чулаьцав цунна юкъе. Кхувш латтараш газаца нийслуча хатарех лорабе гӀерт тхо, царна ха дезараш хьалхадоахаш», - дийцар тха «Сердало» газетага «Газпром межрегионгаз», «Газпром Наьсаре газ лоаттаер» яхача моттигашта кулгал деш волча Лаьнанаькъан Альберта.

Берашца кхетачеш дӀакхухьараш ба газацара гӀулакх дика довзаш бола болхлой, цу моттига кулгалхо. Бераш кхетаргдолча тайпара, цар дӀаэцаргдолаш, хьалхадоах деррига. Тахан яьржача тайп-тайпарча газацарча хӀамаех лорале, царцара бувзам нийса лоаттабе Ӏомабу уж цу балхах болча говзанчаша. Берашта деззача тайпара, паргӀата, хоза дӀайолх урокаш.

Тахан дешархошта хов, газ ийккха, цӀи яьнна хатар хилча, эггара хьалхагӀа де дезар фуд, мичахьара оарц деха деза. Иштта йола кхетачеш, тахан латтача хана, чӀоагӀа лоархӀаме я, хӀана аьлча моллагӀа тайпара хатар ийккхача, корзагӀбаьнна ца удаш, де дезар довзаш, хила беза дешархой. Наьсарерча № 1 йолча гимназе дӀайихьар Наьсарерча газпрома кулгалхочо из тайпара урок. Укхаза цар Ӏомадаьраш хьалхарча классашка дешаш дола бераш дар. Берашта дийцар, цӀагӀа газа хьаж йоагӀаш хилча, йоагаш латта газ цӀаьхха дӀаяйча, фу де деза. Иштта царна хьекхар, газ сага вахаре мел лоархӀаме я, мел эшаш я, дувцаш дола мультфильм.

Лаьнанаькъан Альберта дийцар, газацарча болхлой декхар мехкахошта газ лоаттаярца дувзаденна долга. Цул совгӀа, хатар ийккхача, Ӏалаьмате чехка оарцагӀъухаш уж болгах. Альберта берашта хьалхадаьккхар, хатар хинна хӀама хилча, 04 (шахьарерча телефонах), 104 (мобильни телефонах) диспетчерашка чехка хоам дӀабе безилга. Урок йистеяьлча, из деррига дӀаяздаь латташ дола каьхаташ дийкъар берашта.

«Иштта урокаш дӀакхахьаро берий цу оагӀонцара кхетам лакхбу. МоллагӀа тайпа газацара хатар ийккхача, шоай фу де деза ховргда царна. Тахан чӀоагӀа лоархӀаме да из, хӀана аьлча газацара хатараш каст-каста нийслу вахаре», - дийцар тхога Лаьнанаькъан Альберта.

«Газпром межрегионгаз», «Газпром Наьсаре газ лоаттаер» яхача моттиго, 2012-ча шера денз, хьабахьаш ба газацарча кхерамзленах дувцаш бола болам. Газацара хатараш ма хулла кӀезигагӀа хилийтара тӀехьа, эшаш бола чӀоагӀа лоархӀаме болх ба из. ЦӀеношка, квартирашка бахача наха довза деза цу оагӀонцара лоархӀамедараш. «Кхераме йоаца газ» яхача боламга гӀолла бахархошта хьалхадоах, бокъо йоацача тайпара газ дӀачу-хьачу ехкар соцаде дезаш хӀама долга. Бахархошца бувзам лоаттабеш, лорадеш да газаца хоттаденна лоархӀамедараш.