РФ сенатор волча Илезанаькъан Микаила ший балхацара кхетаче дӏайихьар
Гӏишлошъяра балхех, Шолжа кхален моттигаш тоаярах дувцаш; кхетаче дӏайихьар РФ сенатора Илезанаькъан Микаила Гӏажарий-Юрта. Из хоам «Сердалога» бир мехкарча Паччахьалкхено.
«ФОК тоаеш, ишкол, бассейн, спорта моттигаш хьалъеш, гӏашлой наькъаш дехкаш, керда лампаш йогӏаш, наькъашта юкъе къоастам беш дӏахьоча балхех дийцар кхетаче. Къаьстта терко еш дийцар цига Гӏажарий-Юрта, Галашка ишколаш хьалъеш, № 2 йола ишкол тоаеш дӏахьоча балхех. Федеральни оагӏонца лаьрхӏа хиларах цхьацца йола спорта, дешара оагӏонцара проекташ хьалхарча аргӏагӏа кхоачашъе езаш я», - йоах тахан тхога кхаьчача хоамо.
Гӏажарий-Юртарча Пролетарски оалача ураме керда трансформатор оттабергба, иштта Ленина, Леонидова оалача урамашка гӏашлой наькъаш дахка лерхӏ. Къаьстта терко еш дийцар хин хьалах, юрта болх беш йола машинаш юлача моттигех. Боаггӏача боараме хьаоттабе лерхӏ из болх.
Галашкара футбола лаьрхӏа доазув, спорта моттиг тоае лерхӏ, Эбарга-Юртарча полигона тӏабода никъ меттабоалабе безилга белгалдир. Машинаш лелача наькъа оагӏонашка лампаш йогӏаш, «Мужече» ЛПК хьал тоадеш хувцамаш дергда кхале, иштта лаьттан доазошцара хаттараш даьшхар цига.
