Дешара моттигашта тIадолхаш дола наькъаш тоадеш ба мехка
Дешара моттигашта тIадолхаш дола наькъаш тоадеш, къахьегаш ба тахан мехка. Из хоам бу «Сердалога» цу оагIонцарча министерствос.
«Дешара шу долалуча хана, кийча хила дезаш да наькъаш. Берашта кхераме йоацаш, паргIата, боаггIача боараме тоаяь хила еза моттигаш я уж. Наькъашкара бокъонаш белгалъеш дола улгаш хувцаш, керда лампаш йогIаш, светофораш тоаеш къахьегарда цу моттигашка», - аьлар цу оагIонцарча министерствон хьалха латтача Хаматхананаькъан Батыра.
Бекарга бетта вахарера моттигаш тоаярах йолча проектага гIолла «Илдарха-ГIала–Яндаре» яха кхаь ишкола тIабодаш бола никъ тоабир мехка. Керда асфальт билла, гIашлой наькъаш, светофораш, машинаш сувцаш йола моттигаш тоаеш; наькъа юкъе къоастам беш хьийкха басараш кердадоахаш баьхкаб болхлой.
Мехкара наькъаш тоадарах йолча паччахьалкхен программага гIолла тоабеш латт тахан «Эккажкъонгий-Юрт - Дошлакъий-Юрт» яха никъ. Шин ишкола, иштта лоархIаме йолча кхыча моттигашта тIабодаш бола никъ ба из.
2026-ча шера моттигера, муниципальни оагIонцара 70 км кхоачаш наькъаш да тоаде лерхIараш.
