Галашка керда ишкол хьаелларах, тоалургья дешара таронаш
200 сага моттигаш луш йола ишкол хьалъе болабеннаб Галашка. Из хоам «Сердалога» бир мехкадаь зарбан болх лелабераша.
«65 шу хьалха хьалъяь йола цу юртара ишкол дукха кхоачамбоацараш долаш, зIамига яр. Эггара хьалхарча оагIонца кхоачашде дезача балхашта юкъе латт керда ишкол хьалъяр – шин шера хьалхабаьккхаб из болх. Юххьанца 2030-ча шера оттабаьбар из, тахан 2028-ча шера кхоачашбергболаш къоастадаьд», - белгалдир вай мехкадас Келаматанаькъан Махьмуд-Iаьлас.
Иштта Мехкадас хьоахадир укх тIехьарча шерашка вай мехка итташ керда ишколаш, берий бешамаш хьайийллалга. Бахархошта йоккха парг1ато еш гIулакх хиннад цох. Къаьнарча ишкола меттала йоккха, таханарча хано дIадеххача тайпара тоаяь, деррига хIама чудола ишкол хьалъе езаш ба болхлой.
Галашка бахача наха доккха совгIат да ала мегаргдолаш хувцамаш да уж.
