Малсаганаькъан Зоврбика даь дикаш дагалаьцар тахан мехка
ГIалгIай къаман визза воI хиннача Малсаганаькъан Кураза Зоврбика доккха дикаш даь хилар белгалдир вай мехкадас Келаматанаькъан Махьмуд-Iаьлас, тахан цун 132 шу дузача дийнахьа. Из хоам «Сердалога» бир Мехкадаь зарбан болх лелабераша.
«Къаман исторе лоархIаме моттиг дIалаьца цIераш я, царех цаI ва Малсаганаькъан Кураза Зоврбик. Къаман метта, дешара, мехкарча культуран хIама тоаде гIерташ; дукха къахьийга саг ва из. Ший къаман гIулакха лаьтта саг ва из ала деза цох тахан. Къаман дешара, культуран оагIонцара хIама хьаоттадеш хиннача эггара халача ханашка вай йоазув хьакхоллаш, латиний меттала гIалгIай алапат вIашагIдоллаш, абаташ, ишколошта лаьрхIа книжкаш кийчдеш, ишкол хьаеллача лоархIаме дакъа лоацаш, вай къаман нах дийша, хIама ховш хилийтара тIехьа къахьегаш, лаьтта саг ва Кураза Зоврбик. ГIалгIай къаман метта хIама хьаллацара оагIонца чIоагIа лоархIаме хинна эггара хьалхара гIалгIай «Сердало» газет а цо къахьегаш, из хьалхаэтта малхадаьннад. Iилманхо-лингвист волаш къахьегаш хинна Малсаганаькъан Зоврбик гIалгIай филологи хьакхелларех ва ала деза тахан»,- белгалдир вай Мехкадас.
Къаман литературе, театре дукха къахьийгарех ва из, аьнна, хьоахадир республикан кулгалхочо. ГIалгIай меттала араяьннача эггара хьалхарча драматически произведеней автор ва из, къаман культуран оагIонцарча вахаре доккха дикаш доаржадаьрех ва. Тахан а пайда эцаш, массане лоархIаш да Iилман оагIонца цо даь балхаш; къаман метта хIама тоадеча, Iилман вахаре, культуре эшаш долаш.
«ГIалгIай къаман вахаре лоархIаме моттиг дIалаьца лаьттай Малсаганаькъан Кураза Зоврбика цIи массахана, иштта лоархIаш хургья дIахо дIайодача хана а. ТIехьа тIабоагIарашта масал эца дукха хIама дита, ший къамах дог лазаш вола визза воI ше волга дIахайта саг ва из», - белгалдир Мехкадас.
