МагIалбикера биъ урам тоабеш къахьега лерхI мехка
2027-ча шера вахарера моттигаш меттайоалаярах йолча къаман проектага гIолла Маяковске, Крылова, Крайни оала урамаш, иштта Шаденаькъан цIерах бола урам тоабеш; къахьегаргда МагIалбике. Из хоам тахан «Сердалога» бир шахьара администраце.
«Керда асфальт билла, гIашлой никъ тоабаь, сийрда лампаш егIа, куц эргадоаккхаргда урамий. Бахархошта йоккха паргIато еш хургда из гIулакх»,- йоах хоама тIа. Иштта теркалду, шахьаре эггара хьалхарча оагIонца тоае еза моттигаш белгалъеш долча хоржамашка онлайн дакъа лаца йиш йолаш болга бахархой. Укх бетта 12-ча денга кхаччалца хургда хоржамаш. Дизайн-проекташ харжа йиш я zagorodsreda.gosuslugi.ru. порталага гIолла.
Шахьара куц тоадара тIехьа белгалдеш дола хIара хIама лоархIаме да тахан. Шахьарера сквераш, салоIаш йола моттигаш, наькъаш, урамаш тоадеш болча балха юкъе массане дакъа лацар пайда беш да.
