Мехкарча бахархошта, цхьацца кхоачамбоацараш юстардоахаш, гIо дир премьер-министра
Вахарера цхьацца кхоачамбоацараш дIадахарах йола кхетаче дIахьош хилар бахархошца мехкарча Паччахьалкхенна хьалха латта Сластенин Владимир. «Сердалога» из хоам бир мехка Кабмина зарбан болх лелабераша.
«Кхетаче дийцар бераш-заIапхой долча дезалашта, хала лазараш дарашта, иштта тIема операце доакъашхой гаргарча наха гIо лоаттадарах. ХIара моттиге малагIа болх дIабахьа беза къоастадир цига цу оагIонцарча балхех болча къахьегамхошта декхараш тIадоахкаш», - йоах тхога бенача хоамо.
ДЦП дола итт шу даьнна йиIиг йолча Муцолганаькъан Тамилайна, Паччахьалкхен Кулгалхочо тIадилла, мехкарча Вахара ганзо гIа баккха, ураотта эшаш бола гIирс Iалашбергба, дIахо кхы в малагIа гIо де йиш я хьожаргба.
ЗаIапхо йолча Дидиганаькъан Раисайна тIема комиссариата, гIо дарах болча оагIон болхлоша, цунна эггара чIоагIагIа эшар фуд хьежа, новкъостал дергда.
Наьсарерча администрацена тIадиллар, могаш йоацача йоIага хьожаш йолча Дзаренаькъан Азайна гIо дар.
ТIема операце доакъашхо волча ший виIий цIагIа ток чуйиллар дехаш Янданаькъан Мадинас тIаденача хаттара къаьстта терко ергья. Каьхаташцара цхьацца дола балхаш чакхдаьлча, тIема операце доакъашхочун цIагIа ток, газ чуюлларгйолаш къоастадир кхетаче.
