Йиллача ханал хьалха тоадаь даргда Кен яхача хих тилла тӀий
Кен яхача хих тиллача кердача тӀаь тӀагӀолла болабала йиш йолаш хургба Эккажкъонгий-Юртара бахархой саькура бетта. Йиллача ханал бӀарчча шу хьалха из боккха болх чакхбаккха аьттув баьлар наькъий гӀулакхех йолча Министерствон, Даьла къахетамца эшаш дола ахча ханнахьа хиларах, болх боаггӀача боараме дӀабахьарах. Из хоам «Сердалога» бир Мехкадаь, Паччахьалкхен зарбан болх лелабераша.
Аьшкабетона бӀоагӀий оттадеш, цхьа метр шера бола гӀашлой никъ буллаш, лакхера никъ хувцаш, къахьийгад цига. Керда тӀий йоккха паргӀато луш хургда цига гӀолла дӀаухача машинашта.
Белгалде деза, къаьнара, 9 метр шера хинна тӀий дукха кхоачамбоацараш долаш хиннилга. 42 метр дӀаьха, 15 метр шера дола керда тӀий доккха совгӀат да ала мегаргдолаш да юртхошта.
«Бахархой вахара хьал аттачахьа доаккхаш йола проекташ лакхача боараме болх чакхбоаккхаш дӀаяхьа гӀерт мехка», - белгалдир Мехкадас Келаматанаькъан Махьмуд-Ӏаьлас.
