Кхувш йоагӀа тӀехье, гонахьара Ӏалам лорадеш я
ГӀалгӀайчен кхувш йоагӀача тӀехьено шийна могар ду, гонахьара Ӏалам лораде гӀерташ. «Дикадар де» яха проект кхоачашъеш, Наьсарен кхален Ӏаьлий-Юртарча гимназе дешархоша экологически болам дӀаболабир, каьхаташ а батарейкаш а гулъеш, аьлар «Сердало» газетага юкъарча дешара моттиге.
Болх вӀашагӀболлара дола дакъа шоашта дӀатӀаийцар 6-8-ча классай дешархоша, шоашта чуйоагӀаш лоӀамхой отряд а йолаш. Цу тайпара болх дӀахьош хиларо таро хулийт, гонахьарча наха Ӏалам лорадар мел лоархӀаме да дӀагойта.
«Дикадар де» яхача проектал совгӀа, ГӀалгӀайчен даькъ тӀа «Хьалхарчар лоӀамхой толамаш» дӀахьош да, цунца дувзаденна, «Хьалхарчар Болама» моттигера отделени а цу юкъеера. Цунна шийгара моллагӀа дакъа юкъедахьа йиш йолаш ва дешархо, да-нана е хьехархо», - аьлар тхога хоам баьчо.
