МагӀалбика кхалера тока оагӀон хьал тоадеш ба болхлой
МагӀалбика кхалера тишбенна 7 трансформатор хувцаш болх дӀабихьар «Къилбаседа Кавказа россеташ» - «Ингушэнерго» яхача оагӀон болхлоша.
Керда трансформатораш оттадир МагӀалбике, Инаркъе, Долакоа, Кердача Реданте, Южне, Вежарий-Юрта.
«Доккха баркал оал оаха «Къилбаседа Кавказа россеташ» яхача оагӀон болхлошта. Эггара дукхагӀа ток йоаржаеш йолча моттиге оттабаьб трансформатор. Бахархой хьал хӀанз аттачахьа даргда», - аьлар Инаркъерча администрацена кулгалдеча Котанаькъан Адама.
Шоай болх бехктокхаме дӀахьош болхлой ба уж. 24 сахьата мичча хана Ӏа телефон дӀатехача, бувзаме ба уж. Ер бутт йистебалалехь, кхы а керда ши трансформатор оттабе лаьрхӀа ба уж МагӀалбика кхале. Йоккхача Ачалкхерча 250 Ква болча тишбенначун метта, 400 Ква бола кердабар оттабергба. Юкъерча Ачалкхе латта 160 Ква бола трансформатор дӀабаьккха, 250 Ква бар оттабергба.
«Белгалде деза, керда трансформатораш чӀоагӀагӀа, моллагӀча хаоттама дикагӀа духьалъотталуш, хьайба чудоалалургдоацаш долга. Республикан 4 кхале дӀахьош ба тахан цу мугӀарера болх. 30 трансформатор оттабе лерхӀ вай республике укх шера», - дийцар тхога «Ингушэнерго» яхача филиала кулгал деча ТӀоаршхой Рамзана. 2024-ча шерарча программанна юкъебодаш ба из боккха болх.
