Дешара шу чакхдаларца даькъалабийцар ИнгГУ ректора палестинера студенташ
01.07.2025 11:51
ГӀалгӀай Паччахьалкхен ниверситета ректор йолча Ӏалбаканаькъан Фатимас даькъалавийцар палестинера 20 студент, эрсий мотт Ӏомабеш йола программа чакхъяккхарца. Из хоам «Сердалога» бир цу моттигера.
«Ректора белгалдир, Палестинерча студенташа толамаш дахар дега тоам беш да, аьнна. Абатагара дӀаболабенна, ВӀ боармга кхоачаш (сертификат денна боарам) дешар чакхдаьккхар цар. Цу гӀулакхо хьагойт, мехкара университет кхыча къамашцара бувзам чӀоагӀбеш никъ дӀахьош йолга», - дийцар тхога.
Программа дӀайихьай Московкина Л. Д. эрсий мотт шаьрбарах долча книжкага гӀолла. Студенташ Ӏомабаьб эрсий меттала язде, къамаьл де. БархӀ беттах латта программа царна йовзийташ хиннараш ба Цисканаькъан ИбрахӀим, Ӏарчакханаькъан ИбрахӀим.
