Укх бетта Яндаре дӀабихьар из болх. 2024-ча шера дӀадала дезача ахчах 65,4% мара дӀаденнадац цигарча бахархоша. 22 болхло юкъе вола пхи тоаба я коашка чуувтташ, тока хьал хьагойтача гӀирсашка хьожаш, бокъо йоацаш ток дӀачутийса моттигаш гучайоахаш, рейд дӀахьош лелараш. Тока хьал хьагойташ долча гӀирсашка хьожаш, бокъо йоацаш ток дӀачутийса моттигаш гучайоахаш, болх дӀабихьар цар.

Иштта бахархошта хьалхадоаккх цар тӀалатта декхар ханнахьа дӀадалар мел лоархӀаме да, ток лечкъаяр гӀод ца тохаш дутаргдоацилга, Ӏаьдала болхлой юкъе боацаш тока саьргаш шоаш дӀа-хьа тувсар кхераме долга. 234,5 эзар сом декхар хьагулде аьттув баьлар цу юртара, 52 моттигера ток Ӏохоадайир, декхар хьалуш цахиларах; иштта 124 эзар сом мах болаш йола 17, 6 эзар киловатт-сахьат ток лечкъаяь моттиг гучаяьлар. «ТӀалатташ дола декхар ханнахьа дӀадалар лоархӀаме да, хӀана аьлча из ахча оаха тока гӀирсаш тоадеча, хувцача балха дӀадохийт, - аьлар «Ингушэнерго» филиала кулгалхочун декхараш кхоачашдеш волча БӀарахой Рашида. - Декхар хьачутелаш ца хилча, ток боаггӀача боараме лоаттае аьттув хилац тха, цудухьа цу хӀаман тӀахьожам чӀоагӀа хургба».

 Рейдаш хӀара моттиге дӀакхухьаргья аргӀ-аргӀагӀа. Бахархошта хьалхадоаккх, токах декхар дӀадала йиш я «Сердал Онлайн» яхача мобильни оагӀонга гӀолла, иштта гаргагӀа йолча моттиге дӀаваха. Нагахьа хьаӀайна декхар деррига дӀатакха аьттув беце, тока оагӀон болхлой болча дӀаваха, ший гӀулакх цига ма дарра дӀахайта деза сага.