Тока саьргаш долхача моттига юхе, чкъаьрий лувца Iохувша йиш яц цхьаккха тайпара! Тока саьргашта кIалгIолла дIаводача хана, чкъаьрий лувца зIак урагIдегIа ваха йиш яц, вIаштадилла дIадахьа деза. Ди деттача хана, ма хулла сихагIа гаьнавала веза хин юхера. Хиво ток чуоз, шийна гонахьара 100 метр доазув дIалоацаш. Лийга дадача тока саьргех кулг тоха, бархI метрал юхегIа царна гаргаваха йиш яц!

«Чкъаьрий лувца шоаш Iоховшалехь, гонахьа гIолла дикка дIа-хьа хьажа. Вахар чкъаьрел дезагIа да, цудухьа фийла хила, цу моттиге чкъаьрий лувца бокъо йоацилга белгалдеш дола, хьалдийтта доахка улгаш теркалде!» - йоах «Ингушэнерго» филиала кулгал деча ТIоаршхой Рамзана. – Масала, лаьттани тока саьргаштеи юкъе эггара кIезигагIа ялх метр хила еза, хIаьта таханара чкъаьрий лувцаш дола зIакаш дикка дIаьхагIа да. Цул совгIа, уж хьадаь хIама геттара чIоагIа ток тIаозарех я. Ца ховш из зIак тока саьргех дIахьокхалой, ток теха яьннай. Ший вахар санна, гонахьа мел латтача наьха вахар а кхерамеча хьале оттаду лоралуш воацача сага».

Тока оагIон болхлоша хьалхадоаккх, нагахьа шоаш бера чкъаьрий лувца зIак луш дале, эггара хьалхарча аргIагIа цунна хьалхадаккха, малагIча моттигашка чкъаьрий лувца йиш яц. Тока моттигашта юхе лораде дезараш теркалдеш воацачунга; фийла хила, хьай вахара уйла е, ала. Иштта аьлча, цунна гIо ду оаш!