ЖӀайрахьа кхале дӀахьош бола тоадара болх халагӀчарех цаӀ ба. ЦӀаьхха, хувцалуш бола хаоттам, лакхача лоамашкара моттигаш, голаш етташ дола наькъаш, даим цига уллаш дола лоа, хьекхаш бола мух, чулегаш дола кхертӀой энергетикий балха юкъе цахаддаш долаш да.

ЛЭПа Ӏалашъю токаца йоккха йоаца юрташ Бейни, Говзт, Духьургиш, сотови бувзама станци, бокъонаш лораерий балха моттигаш. Цул совгӀа, ток дика хьаяларца дувзаденна ба Духьаргиш яхача къаьнарча гӀалай моттига болх а.

Духьаргиш улл Маьтлоама даькъ тӀа, из я йиъ вахара, цаӀ ах тӀема гӀалах латташ. Из хьалъе йолаяьй 11-12 бӀаьшерашка. Цо дӀалоац гӀапаца цхьана 6 эзар квадратни метр. Цунна гаьна доацаш да малхара кашамаш: кхолха, шолха даь. Энергетикаша хийцар тока саьргаш шиннахьа 3,6 километр, тишденнараш дӀа а даьха, цига кердадараш (СИП) дӀахеттар. СИП саьргаша таро лу шоайла вӀашагӀкхетаргдоацаш, хаьда чудоагӀаргдоацаш йола чӀоагӀо цига хилийта, уж шоайла къаьста хиларо, дукха лоа дилладар аьнна, гӀорадайтац. Из юкъедоаладарах 0,4-10 кВ йолча токаца Ӏалашо яра керттера декхараш юстардоах цо, цудухьа тешшаме токаца Ӏалашо а ю из лелаеча наха. Из доацаш а, цӀи ялара духьаларча саьрго таро лу оалхазараш, хьайбаш токах лораде.

ГӀалгӀай мехкара ЖӀайрахьа кхале дегӀайоалаяра йола программа кхоачашъе лерхӀ, из 20 шера дӀаяхьа лаьрхӀа я. Цу проекта чудоагӀаш да гӀалаш йола моттиг, бувзамаш лоаттаду моттигаш тоаяр, отелаш хьалъяр,- аьлар «Ингушэнерго» филиала кулгалхочо БӀарахой Рашида.-Бакъда энергетикий къахьегам боацаш хьалъе таро хургьяц вахара гӀишлош, иштта кхерамзлен ла е, наха лоаттадеш долча хьалий дикал лакхъе, бизнес дегӀайоалае, инвестицеш юкъеяха. Цудухьа вай аргӀ-аргӀагӀа кхоачашбу даькъ тӀара ток тешшаме хилтйтарца бувзабенна бола болх».