Берий кхерамзле лораеш бола болх дӀахьу «Къилбаседа Кавказа россеташа»

Дешархошта цар хьалхадаьккхар тока бӀоагӀашта тӀабувла, трансформатораш латтача доазон гаргааха, ток йодача лакхе тӀабувлаш сурташ даха йиш йоацилга. Ток мел кхераме я, мишта лоравала веза дийцар цар берашка. Ток теха саг кӀалхарваккха йиш йолга хайра берашта, нийса гӀо даь; иштта «ВКонтакте» яхача оагӀонашка «Россеташа» хьайийлла проект, токацара гӀулакх нийса леладе хьехаш йолча Лампочкина Машай оагӀув байзар царна.

«Кхувш латтараш токацара бувзам нийса лелабе Ӏомабар да тха декхар. ЦӀагӀа, ара лораде дезараш фуд ховш хила беза уж, - аьлар «Ингушэнерго» филиала кулгалхочун декхараш кхоачашдеш волча БӀарахой Рашида. - Тока саьргашта юхе чкъаьрий лувца, ловза, хаьдача тока саьргашта юхеаха йиш йоацилга дувцарал совгӀа, цу хӀамаех лоралуш ца хилча, хила тарлуш дола хатараш дӀадовзийт оаха царна. Из деррига боаггӀача боараме бераша кхетадар чӀоагӀа лоархӀаме да».

Массайолча моттигашка дӀакхухьаш кхетаченаш я уж. Цу юкъе да урокаш, викторинаш, ишколай доазон тӀа латта тока гӀирсаш долча экскурсеш дӀакхахьар.