Йиъ моттиг тоаяьй Шолжа-Шахьаре; Эбарга-Юрта - цхьа моттиг. 540 совгӀа цӀагӀара, ишколера, берий бешара токацара хьал дикка меттаденад из болх дӀабахьарах. «ХьалхагӀа каст-каста йохар тха токацара цӀагӀа лелаю хӀамаш, хӀанз деррига меттаденад. Баркал хилда тока оагӀон болхлошта, из гӀулакх чакхдаккхарах. Сердал, ток боаггӀача боараме дӀакхоач наха», - аьлар Шолжа-Шахьаре вахача Озанаькъан Мовсара.

«Тоаяьчул тӀехьагӀа, хӀетта дӀаоттайича санна хеталуш я трансформатор. Тешаме, кхераме йоацаш, болх беш я уж хӀанз. ХӀаьта из чӀоагӀа лоархӀаме да, юхе ишкол хиларах. Бераш дагадахка дезац, ток а боаггӀача боараме я»,- дийцар Шолжа-Шахьарерча Къоастой Мухьмада.

Ер бутт йистебалалехь, 1,2 МВА низ бола кхо трансформатор кхы а тоае езаш ба болхлой: ГӀажарий-Юртара шиъ, Галашкара - цаӀ.

Мехка йиъэ кхалене дӀахьош латт цу лостамагӀа беш бола болх.