«Къилбаседа Кавказа россеташ» яхача оагӀоно 30 керда трансформатор оттаергья вай мехка
2024 шера 30 керда трансформатор оттаеш, болх дӀабахьа лерхӀ вай мехка. ЖӀайрахьа, МагӀалбика, Наьсарен, Шолжа кхаленашка дӀахьоргба из беркате болх. Таханарча ханага хьежжа дола керда, дикагӀа дола тока гӀирсаш оттаде лерхӀ МагӀалбике, Шолжа-Шахьаре, Наьсаре, Яндаре, Эккажкъонгий-Юрта, Сурхо тӀа, Ӏаьлий-Юрта, Йоккхача а Юкъерча а Ачалкхенашка, ГӀаьзе-Коа, Пхьилекъонгий-Юрта, ГӀажарий-Юрта, Эбарга-Юрта, Долакоа, Махьмад-Хи тӀа, Вежарий-Юрта, Инаркъе, Мужеча, Галашка, ЖӀайрахьа.
Белгалде деза, керда трансформатораш моллагӀча хаоттама духьала чӀоагӀагӀа, дикагӀа лаьрхӀа йолга. Цу боккхача балхо, дикка аттачахьа доаккхаш, тоадергда вай мехкара тока хьал. Гуйран шоллагӀа бутт тӀакхачалехь, йистедаха лерхӀ уж хувцамаш.
235,4 млн рузкъа да «Къилбаседа Кавказа россеташ» яхача оагӀоно вай мехка из боккха болх дӀабахьа хьахьожадаьр. 2023-ча шера хинначул, 62% из дукхагӀа долга.
