«Къилбаседа Кавказа россеташа» ГӀалгӀайчен ЛЭПа 4 моттиге кхоачамбоацараш лехад
«Къилбаседа Кавказа россетий»-«Ингушэнерго» филиала говзанчаша Наьсарен кхален Пхьилекъонгий-Юрта аргӀанара «ЛЭП-стоп» яха болам дӀабихьар. Из лаьрхӀа бар бахархоша тока бӀоагӀий дагӀача даькъ тӀа бокъонаш телхаергйоацаш. Цу тайпара йиъ моттиг гучаяьлар цу даькъ тӀа.
«Дарьял-Пхьилекъонгий-Юрт (ЛЭП) 110 кВ шин оагӀорахьа тока бӀоагӀий долхача моттига йисте хьалдеш латт цӀа: энергогIирса дӀатӀакхача йиъ метр мара яц цига.
Цунах тарра моттиг цхьаькха а яр - керда хьалдаь цӀа белгалдир энергетикаша Пхьилекъонгий-Юрт-Водонасосни оалача 35 кВ тока бӀоагӀий дагӀача моттиге.
Шиъ тока бӀоагӀа 35 кВ, Пхьилекъонгий-Юрт-Илдарха-Гӏала яхача моттиге нийсбелар, цӀен лардаш дӀаехкача даькъ тӀа.
Цхьаькха моттиг я, мехка вахархочо ший карта лаьрхӀа лард дӀайолаяьй, тока бӀоагӀий долхача даькъ тӀа хьатӀа а ваьнна. Картал дехьа багӀа, 35 кВ йола шолха шиъ тока бӀоагӀа, иштта ЛЭП 6 кВ даькъ тӀа трансформаторни подстанци а я.
Гучадаьннача кхоачамбоацарех энергетикаша лоткъамаш оттадаьд. Каьхаташ дӀадохьийтаргда кхален а юрта а администрацешка, ГӏалгӀай Республике гӀолла йолча Ростехнадзора Кавказски урхаллене, ГӏалгӀайче гӀолла йолча Республикан прокуратуре.
«Цхьацца йолча моттигашка низ бола тока бӀоагӀий долха лораеш йола моттигаш ерригаш дIалаьцай. Дуккха тоннаш йола тока гӀирсаш бахача наьха коашка, сомий бешамашка, цӀеношта геттара юхе нийслу.
Нагахьа санна цига кхоачамбоацар нийсденна моттиг хуле, лаьрххӀа йола техника юкъе ца яьккхача, энергогIирсаш тоаде йиш хургьяц. ЛЭПа тӀабода никъ дӀакъайлаб дукха гӀишлош хьалъярца, - аьлар «Ингушэнерго» филиала кулгалхочо Котаганаькъан Кимрана.- Цу тайпара хьал мехка кхерамзленна новкъа да. Оаха тӀахьех моттигашкара доал деча даькъ тӀара Iаьдал, тӀахьожам лоаттабара йола моттигаш, цу деша йоагӀаш йола терко яра».
Гӏишло хьалъе йолаялалехь, тахка деза из моттиг энергогIирс лорабара даькъ тӀа нийслуш йий.
Лорадеш дола дакъа - из лаьттан а, фецара а, хин а моттигаш чулоацаш да ЛЭПа шинна а оагӀорахьара. 2009 шера саькура бетта 24-ча дийнахьа, РФ Паччахьалкхен Соцамах, могаеш йола юкъера юкъ я: 1 кВ лохагӀа йолча ЛЭПа - 2 метр; 1-20 кВ ЛЭПа-10 метр; 35 кВ ЛЭПа - 15 метр; 110 кВ ЛЭПа- 20 метр; иштта 100 метр хи тIагӀолла йолча ЛЭПа.
Белгалдаьккхача доазон тӀа гӀишлош хьалъе бокъо луц, е цу тӀа тӀабода никъ а дӀакъовла йиш йолаш бац, цига нувхаш гулъе йиш яц, е машинаш лоаттаю моттиг цига хьалъе бокъо яц, материалаш лораяра складаш, спортивни майдаш, транспорт юхасецаш йола моттиг хила йиш яц цу даькъ тӀа, дукха нах вӀашагӀкхийтта кхетаче а цу юхе дӀаяхьа бокъо луц. МоллагӀа дола гIулакх сетей компанешца вӀашагӀдолла деза.
