ЛЭП 35 кВ «Наьсаре-Хин насосий» даькъ тIа, кхерамзлен бокъонаш лораеш цахилара аргIанара моттиг белгалйир.

Къаьстта цу электрически аьшкасаьргаш долхача бIоагIанна кIалха хьадоладаьд гIишлон балхаш: кIоаг баьккхаб, кхы дIахо ца доагIаш дола балхаш даьд, гобаьккха аьшка карт а яьй.

Балха тоабо акт оттаяьй. Цу гIулакха доагIаш дола каьхаташ дIадахьийтад шахьара администраце, ГIалгIай Республике гIолла йолча Ростехнадзора Кавказа урхаллене, ГIалгIай Республикан прокуратуре.

«Из аргIанара кхерамзлен бокъонаш телхаеш хилар да «Наьсаре-Хин насосий» электричество дIахьожаеча даькъ тIа нийсденнар,-аьлар «Ингушэнерго» филиала кулгалхочо ТIоаршхой Рамзана. – ЛЭП йиъ юрта электричество лоаттаеш я. Технологе оагIорахьа кхоачамбоацараш нийслой, е тоадара балхаш ца деш дусе, из йоацаш вус 26 эзар саг, иштта 12 вахара лоархIаме моттиг. Цу юкъейоагIаш я Аьлтий-Юртара хий лоаттаду моттиг, цо ерригача Наьсарен хицара Iалашо лоаттаю. Бакъда «Ингушэнерго» цу моттига доаггIача беса доал де йиш йолаш яц, цига лаьрххIа йола техника чуяккха моттиг цайитар бахьан долаш».

Тока саьргаш долхача объекташта юхе гIишлон балхаш деш хилар чIоагIа кхераме долга даим хьалхадоах энергокомпане болхлоша. Юкъерадаккха йиш йоацаш да, цIаьхха чIоагIа мух хьекха, чIоагIа догIа дийлха, тока саьрг хада йиш йолаш хилар, цох доккха зулам дала а тарлуш хилар. Цул совгIа, тока саьргашта кIалха дукха хила а йиш яц, из Iаткъаш хул сага унахцIенонна. Бакъда из кхетадераш дукха бац.

Ше моллагIа дола балхаш дIадоладале, ха деза тока саьргаш долхаш из моттиг йий. ДукхагIбараш, шоашта из ховшшехь а, цига гIишло хьалъе кийча ба. Царна хет, шоаш цIа е кхыйола гIишло хьаяьчул тIехьагIа, «Ингушэнергос» ЛЭП дIадехьайоаккхаргья, аьнна.

Энергетикаша теркал ца еш йитац из санна йола моттигаш: акташ оттаю, Iаьдалга уж дIа а лу. Бакъда цу тIа тха болх чакхбоал. Цудухьа оаха тIахьех доал деча даькъ тIара Iаьдал, тIахьожама моттигаш из дош чIоагIагIа теркалдара», - аьлар ТIоаршхой Рамзана.

«Къилбаседа Кавказ россеташа»-«Ингушэнергос» хьалхадоаккх: лорадеш дола доазув из ЛЭП йолча моттиге, лакхера а, лохера а, иштта хи чура а дола доазув хул шинна оагIорахьара. РФ Паччахьалкхено 2009 шера саькура бетта 24-ча дийнахьа арабаьккхача Соцам тIа могаеш йола моттиг белгалъяьй: ЛЭП лохе ши метр 1кВ; 10 метр- 1-20 кВ лаьрхIа; 10 метр-ЛЭП 1-20 кВ; 15 метр - 35 кВ ЛЭП лаьрхIа; 20 метр- 110 Кв ЛЭП; 100 метр- хин юкъе гIолла йола ЛЭП.

Цу белгалдаьккхача доазон тIа гIишлош хьалъе бокъо яц, е из моттиг дIакъовлаш йола хIамаш цига Iомоассае йиш яц; нувхаш гулъе а, цIи сага а, машинаш цига дIаоттае а бокъо яц. МоллагIа дола хьал тока компанеца чIоагIдаь хила деза.