Гӏалгӏайчен кӏалхарбоахарашта яйзар, «ШодСанЛат» яхача латара говзал
Укх деношка, халкъа цхьоагӏон Ди долаш, гӏалгӏай кӏахарбоахарий вӏашагӏкхетар хилар «ШодСанЛат» яхача латар хьакхеллача Сукенаькъан Махьмад-Гиреца. Цунцара кхетаче дӏайолаелар республикан МЧСа актови зале теоретически экскурси еш, из дӏахьош министерствон болхлоша гойтар документальни фильм, из дар цу латара говзалах дийца ца ӏеш, цун автора вахара наькъах дувцаш.
Гӏалгӏайче гӏолла йолча«Россе МЧСа Керттерча урхаллен кулгалхочун гӏончас Котанаькъан Ахьмада Сукенаькъан Махьмад-Гирена баркал оалаш дола каьхат делар, цо спорт дегӏайоалаеча доккха дакъа дӏалоацаш хилар белгал а деш. Цул тӏехьагӏа, кхетаче дӏайолайир спортивни зале, из дӏайихьар гойтара даькъ тӏа. Балха говзал чӏоагӏа йолча Сукенаькъан Махьмад-Гире гойтар МЧСа болхлошта массехк керттера латара оамал, «ШодСанЛатара» техника», - аьлар «Сердало» газетага МЧС зарбан болх лелабераша.
Белгалду, гӏалгӏай лаьтта хьакхелла латар дика даьржа хилар, из чудоагӏаш да Ерригроссийски спорта. Говзанчаша яхачох, «ШодСанЛат» спорта керттердар - шоайла лоархӏаш хилар, оамала чӏоагӏбалар, шоай дегӏ нийса леладе хьажар да. Уж оамалаш МЧСа болхлошта а эшаш я, хӏана аьлча цар беш бар а физически мухь токхабеш болх ба, чоалханеча хьалашка беха боацаш, де дезар дӏахьош.
