Гӏалгӏайчен вахархочох дегабуам бу, полицена духьала низ баьб аьнна хеташ
Гӏалгӏай мехка гӏолла йолча Наьсарен кхален СК тохкамхоша зулам дарах дола гӏулакх хьадийллар 18 шу даьннача моттигерча вахархочунна духьала. Из бехкеву цо ӏаьдала болхлошта духьале ярах.
«Тохкама болх дӏабихьараша яхачох, 2026 шера, ардара бетта 26-ча дийнахьа полице болхлой, Магас-Шахьара Заьзганаькъан Идриса проспекта тӏа тӏахьожама-чӏоагӏон ха тӏа шоай болх дӏахьош болаш, цар соцайир каьхаташ дий хьажара моттигерча вахархочун машин. Бакъда водитель ший машинаца, полице болхлошка ла ца дувгӏаш, цигара къайлаваьлар.
Цул тӏехьагӏа из машина корайир Магас-Шахьаре. Полице болхлой бӏаргабайча, цо шийгара Калашникова автоматах тара дола герз юкъедаьккхар, ший болх дӏахьош йолча полице тоаба духьала. Цу моттиге сиха кхаьчар Россе СК тохкама болхлой; тохкамхой, иштта тохкамхой-криминалисташ чухьежар, цунгара хьадаьккхар герз, кхыдола тешалаш, уж уголовни гӏулакх дӏахьош дезаш да. Цул совгӏа, из саг вахача моттиге чухьежаб», - аьлар «Сердало» газетага Гӏалгӏайчен тохкама комитете.
Из лаьца дӏавигар, кастлуш цунца хьалхара тохкама болх дӏахьоргба, хиннар дӏахо ма дарра довза дагахьа.
