ВӀаштӀара даьча цӀеношта тӀахьожам лоаттабеш йола компанеш, ГӀалгӀайче болх бе йолалургья
Тушола бетта денз, тӀахьожам лоаттабеча компанеша шоай болх дӀаболабергба ГӀалгӀайчен ерригача доал деча моттигашка, вӀаштӀара даь цӀенош мел долча. Цох дийцар республикан Кулгалхочун, Паччахьалкхен зарбан болх лелабераша.
Карарча хана, тӀахьожам лоаттабеш йола компанеш болх беш яц Наьсаре, Магасе. ГӀалгӀайчен кулгалхочо Келаматанаькъан Махьмуд-Ӏаьлас декхар тӀадиллар, из хаттар тушола бетта 1-ча денга кхачале кхоачашдаь хилийта; цох бола хоам бе, аьнна.
«Говзал лакха йолаш, дӀахьош болча тӀахьожама балхо таро лургья вахара-коммунальни хьалаш тоаде, иштта наьха хьашташ сихагӀа кхоачашде», - аьлар мехка кулгалхочо ший бувзама моттигашка гӀолла.
Цо яхачох, из юкъедаккхаро бахархошта, компане болхлошта юкъе бувзам оттабергба, цо ший аргӀагӀа дикагӀа дола вахара хьалаш хьакхолларгда, нах чубахаш йола фусамаш дикагӀча хьале лелаергья.
Иштта республике дика юкъедоаладеш латт «Госуслуги.ЦӀа» яха мобильни юхедуллар, цо а ший оагӀорахьа таро лу квартирай фусам-даьшца, тӀахьожам лоаттабеча балха моттигашца бувзам лоттабе. Таханарча денга кхоачаш, из юхедуллар леладеш ва 1 763 саг.
Из леладеш хиларах боала пайда гуш ба: цо таро лу счётчика тӀара хоам хьагулбе, ЖКХ хьалех бола мах дӀабала, гӀишло геттара тоаяра тӀехьа хьажа, цӀеной бахархой гуллуча дакъа лаца, тӀахьожам лоаттабеча компане балха хьал довза, аргӀанара а геттара сиха динза даргдоаца хатаре а балхаш довза.
«Аз лоархӀ, «Госуслуги.ЦӀа» яха юхедуллар - из бахархошта а иштта тӀахьожам лоаттабеча компанешта а дика накъадоалаш да, из леладераш дукхагӀа хилча бакъахьа бар», - аьлар Келаматанаькъан Махьмуд-Ӏаьлас.
