ГӏалгӀайчен бюджете хьачудера 36 млн паччахьалкхен хӀамай аренадах
ГӏалгӀайчен доалахьарча хӀаман министерство болх беш я паччахьалкхен доалахьардар леладарах бола пайда совбоаккхаш, республикански бюджете хьачубоагӀаш бола. Ер шу дӀадоладелча денз, мехка хьачуденад паччахьалкхен доалахьардар арендах леладарах хьахинна 36 млн сом, аьлар ГӏалгӀай Республикан Кулгалхочун, Паччахьалкхен зарбан-болх лелабераша.
47 лоткъам чубеннаб лаьтта арендах леладарах доалла декхар хьадаккхара, цун мах ба 24 млн сом.
Декхар хьадаккхара бола болх дӀахьош а тӀахьожам беш а ба. Ер шу чакхдоалаш, хила тарлу дукхагӀа пайда, юкъера дӀалаьрхӀаxа – уж да 60 млн сом.
ГӏалгӀайчен кулгалхочо Келаматанаькъан Махьмуд-Ӏаьлас белгалдир, паччахьалкхен доалахьардар нийса леладеш хуле, цох хьабоала пайда а лакха хургба, из лоархӀаме да республика экономически дегӀаяра:
«Декхар хьадаккхара, Минимущества балха, лелаеш йоаца активаш юкъеяхарах, мехка доалахьара таронаш лораяра дика толамаш даьха хилар гуш да».
Белгалду, мехка кулгалхочо ший теркама юкъе лоаттаду дӀаязъянза йола гӀишлош гучаяхара хаттар. Цо яхачох, ишттача балхо таро лургья йоалах хьабоалаш бола пайда лакхбарал совгӀа, паччахьалкхен доалахьардар леладара хьал а тоаде.
ХьалхагӀа мехка кулгалхочо иштта Минимуществон хьалхашка декхар оттадаьдар, лелаеш йолча таронашта тӀахьожам лоаттабара, доалахьардар бокъонах хила деззача беса хилийтара.
