ГӀалгӀай мехка дегӀадоагӀаргда ахархой дешар
ГӀалгӀайче тов бетта 1-ча дийнахьа денз, дика дегӀадоагӀаргда ахархой дешар. Проекта чудоагӀаш, Наьсарен, Шолжа ишколашка, иштта Эккажакъонгий, Долакха юрташка, Юкъерча Ачалкхе, СоагӀапча хьаелларгья ахархой классаш.
Дешара программа къаман проекта цхьа дакъа да «Технологически Ӏалашо яр кхачан кхерамзленна». Из лаьрхӀа я дешархошта ахархой балха говзал йовзийтара, ишколе деша багӀача хана денз. Программа чудоагӀаш да 6-11 классашка цунна чудоагӀаш дола Ӏилмаш Ӏомадар, цул совгӀа хьалхале лелаеш йолча республикан предприятешка, колледжашка къахьега Ӏамар.
Маьцхали бетта 10-ча дийнахьа кийча хургья керда дешара программаш, царна чухьа «Юкъедоаладар ахархой профессешка» яха кхетачен планаш а йолаш. Ахархой классашка хургья таханарча дено дӀадеххача беса дола гӀирсаш: лаьрххӀа йола кабинеташ, агрономех дола литература, болх дӀабахьара дика хьалаш, онлайн-дешара лаьрхӀа интернет.
Проекто ший наӀараш хьаелларгья агрономе даькъ тӀа 250 дешархочунна, яхаш, дийцар ГӀалгӀай Республикан Кулгалхочун, Паччахьалкхен зарбан болх лелабераша.
«Тхо хьож теоретически дешара, практически балха кердадараш довзийта, таханарча заман юртбоахама технологей гӀонца», - аьлар мехка кулгалхочо Келаматанаькъан Махьмуд-Ӏаьлас.
Ахархой классаш хьакхолларо новкъостал дергда говзанчаш кхебе, тахан дукхагӀа дӀадехаш долча балха даькъ тӀа къахьегаргдолаш.
«Тхо лаьрхӀа да, из говзал дика юкъе а йоаккхаш, 2030 шерга кхоачаш, республикан ишколашка 100 совгӀа ахархой класс хьаелла», - аьлар Мехкадас.
