Мехкахоша дагалоаттаю Курски дукъ тӀа латаш хиннача Пхьилекъонгий Саварбика цӀи
Карарча шера 81 шу дуз Курски дукъ тӀа тӀом лаьтта, Сийлахь-боккхача Даьймехка тӀема никъ из бахьан долаш хувцабелар. МоастагӀа эшавеш, цига геттара чӀоагӀа латар эттар, цул тӀехьагӀа советски эскарга совле а хилар. Дерригача дуненна цу хана бӀаргадайра вай мохк чӀоагӀа хилар, барт болаш а цхьоагӀо йолаш а хилар.
Цу цӀихезача Курске дукъ тӀарча латара даькъ тӀа дакъа лоацаш хиннав Пхьилекъонгий Лорса Саварбик. Цига цо гойтача тӀема деналах, майралах, баьккхача толамах ТӀема ЦӀеча Байракха орден елар цунна.
«1943 шера кӀимарса бетта, моастагӀа танкашца тӀагӀерта хиннав вай бӀуна, цунна керттера низ тӀабахьа лаьрхӀа. Бакъда вай салтий шийна иштта духьалъоттаргба, аьнна, цунна дага хиннадац. Цига моастагӀа эшавеш, шиъ танк а йохайир, гӀашлой ши бӀу а хӀалакбир, вай мехкахочо кулгал а деш. МоастагӀа юхатехар», - йоах 1943 шера кӀимарса бетта Пхьилекъонгий Лорса Саварбика деннача тӀема совгӀата тӀа.
ТӀема ханара цун гӀулакхаш дувцача каьхаташа хьагойт из денал долаш, майра хиннилга; сакхетам лакха болаш, хьинар долаш, шийгара хьалхале гойташ хьавенилга, командир хиларах тарра.
2015 шера оагӀой бетта, ТӀаргиме латтача №139 йолча анзорий ковна елар Пхьиленаькъан Лорса Саварбика цӀи. Из бокъонца цӀихезача анзорех цаӀ вар вай республике.
ТӀом йистебаьнначул тӀехьагӀа, из хиннав тайп-тайпарча тӀема дарже, цо тӀема гӀулакх йистедаьккхад 1958-ча шера, гвардейски эскара 11-ча мотоиччархой бӀун 1-ча мотоиччерхой дивизе 171-ча сура командира заместитель волаш.
ТӀема гӀулакх дитачул тӀехьагӀа из къахьегаш хиннав партийни-боахама балхаш тӀа, дукхача шерашка кагирхошта Даьхенцара безам совбоаккхаш кхетам луш хилар из, иштта из вар тӀема ветераний республиканский Совета кулгал деш.
Цун тӀема, вахара никъ денале а чоалхане а хиннаб, цунна карагӀдаьнначарех наха доаккхал а деш, цудухьа из дукхаза белгалваьвар паччахьалкхен лакхача совгӀаташца. Царна юкъе я ЦӀеча Байракха ши орден, ЦӀеча Седкъан ши орден, 1-гӀа дозал дола Даьймехка тӀема орден, ДоттагӀала орден, Сийлен орден, «ТӀем тӀа карагӀдаьнначох» яха майдилг, Жукова майдилг, «ТӀема ветеран» оала майдилг.
Укх дунен чура дӀавахар денал дола Даьхен бӀухо 2013-ча шера, ший 94 шу даьннача хана. Тахан ГӀалгӀай мехка цун цӀи дагалоаттаю. Лорса Саварбика вахар хиннад, вай кхувш йоагӀача тӀехьено масал эца йиш йолаш, Даьхенцара безам совбоаккхаш, денал, майрал гойташ. Ший мохк безаш ваьхав из.
