«CHABORZ» яхьера бархӏ майдилг яхьаш, цӏакхаьчар Долакха-Юртара спортсменаш
Долакха-Юртара спортсменаш «CHABORZ» яхьера бархӏ майдилг яхьаш цӏенах кхийттар. Даькъастен моттигашкара, иштта Россе кхыйолча миӏингашкара 400 совгӏа толашагӏа вола спортсмен гулвенна хинна кагирхошта юкъера яхьаш, лайчилла бетта 14-ча денгара 15-ча денга кхаччалца, хилар Нохчий-Ауле. «Сердалога» из хоам кхален администрацера бера.
Белгалде деза, Долакха-Юртарча ДЮШС кагирхоша лакха говзал гойталга. Шиъ дошо, цаӏ дото, пхиъ борза майдилгаш яхьаш цӏабаьхкар уж. 57 кийла дозал дарашта юкъе котваьнна, лакхерча лагӏа тӏа ваьлар Ӏалбаканаькъан Саӏид, иштта Коазой Мухьаммад (92 кг).
Дото майдилг ӏоэллар 51 кг дозал дараштаюкъе белгалваьннача Гаракхой Мухьмад-Амина. Борза майдилг яьккхар Гӏазакханаькъан Расула (35 кг), Осменаькъан Мансура (71 кг), Осменаькъан Сулеймас (52 кг), Гелисханаькъан Кермас (75 кг).
Лакха говзал йола тренер Гаракхой Шамал ва спортсмнаш кийчбаьр.