Хьатеха 140 млн декхар дӀатакхарах, ток дӀа ца йоаеш, бисар республикан бахархой
2024-ча шерарча пхе бетта тӀалатта декхар дӀадала раьза боацарий гӀулакхах дийцар «Къилбаседа Кавказа россетий» «Ингушэнерго» яхача филиала болхлоша. Укх шерара Ӏан юкъера бутт-бӀаьстан тӀехьара бутт чулоацача юкъа 6000 эзар совгӀа йолча моттигера ток дӀахоадае, аьнна, соцам бир тока оагӀон къахьегамхоша. Царех 4000 бахархой бар, 2000 эзар совгӀа республикера тайп-тайпара болх бу моттигаш яр. Ток хьателача оагӀонна цар дӀадала деза ахча 349 млн сом дар. Нахаца къамаьл деш, болх дӀабихьачул тӀехьагӀа, 140 млн ахча дӀатекхар 2,2 эзар вахархочо.
«Декхар хьацадаларах ток дӀахоадае оттар, чам боацаш гӀулакх да. Бакъда 7,7 млрд ахча республиканна тӀалатташ хилча, из де дезача кхоач тока оагӀон болхлой. Бахархоша шоашкара доагӀар ханнахьа хьалуш ца хилча; тоаде дезар, тишденнар хувца аьттув балац.
БоаггӀача боараме ток хургйолаш, нийслуш дола хатараш юстардаха низ хургболаш, тӀалатта декхар, шоашта низ ца байташ, дӀатела деза наха», - белгалдир «Ингушэнерго» филиала кулгал деча ТӀоаршхой Рамзана.
Филиала «Клиентам» яхача сайте довза йиш я ток дӀахоадаергйолча моттигех дар. Бахархошта юха а хьалхадоаккх, токах доагӀар дӀадала йиш я «Сердал Онлайн» яхача мобильни оагӀонцарча «Лични кабинете гӀолла», е тока оагӀон болхлой болча дӀаваха.
Нагахьа санна тӀалатташ дола деррига декхар дӀатакха аьттув беце, юхерча тока оагӀон моттиге дӀаваха, ший хьал ма дарра дӀадувца деза.
