БӀарий-Аьли яхача хица дувзаденна кхоачамбоацараш
Магаса доазон тӀа болх дӀахьош хиннача гӀишлон балхаш леладеча оагӀонна духьала административни гӀулакх хьадийллар вайцигарча Ӏалама гӀулакхех йолча министерстве экологецара тӀахьожам лоаттабеча инспектораша. Бахьан – Сурхо тӀарча хих дӀакхеташ долча БӀарий - Аьли яхача хи чу гӀишлон балхаш даьчар совъяьнна нувхаш чукховсар. Из хоам «Сердалога» бир цу оагӀонцарча министерстве.
«Ӏалама моттигаш лораярах йола бокъонаш йохаеш дола во да царна карагӀдаьннар. Хий бӀехдеш, Ӏалама зе дарах РФ КоАП 6-ча даькъа 8.2 статьях бехктокхаме озаргба из зулам даьраш», - йоах тхогарча хоамо.
ГӀишлон балхаш леладеча оагӀон 600 эзар сом гӀод техад, иштта цу моттиге Ӏалама даь зе меттаоттаде деза цар. Ӏалама гӀулакхех йолча министерствос кхайкарал деш латт бахархошка; совъяьнна хӀамаш, нувхаш Ӏокхувсаро мехкарча экологена доккха зе ду, из болх лелабераш бехктокхаме ца озаш бутаргбац, яхаш. Ӏалама моттигашта вайцига тӀахьожам лоаттабу цу оагӀонцарча къахьегамхоша.
