500 гектара тӀарча хьун унахцӀено тоае лерхӀ
08.10.2024 16:32
2025 шера 500 гектар доазон тӀарча хьун унахцӀено тоаяра дола балхаш дӀадахьа лерхӀ, яхаш, хоам бу «Сердало» газетага республикан Ӏалам лорадара боахаме.
«Теркам тӀабохийтаргба хьун доакъошта. Уж дерригаш а ворхӀ да Шолжа, Наьсара кхаленашка. Белгалъяьккхача ах моттиге санитарно-унахцӀенон балхаш дӀахьоргда», - йоах хоамо.
Хьун боахама говзанчаша 115 гектара тӀа санитарни болх бергба, юкъ-юкъера дика дегӀайоагӀаш йоаца гаьнаш дӀатедаш, иштта 135 гектара тӀара пайдана доаца дахча арадоакхаргда.
Тайп-тайпара лазар кхийтта гаьнаш ший ханнахьа дӀаяхаро таро хулийт хьу тоае, из цӀенъе, хозагӀа, сийрдагӀа хилийта.
