Яндар яхача хин хьал меттадоаладеш, болх дӀаболабаьб
Яндар яхача хин экологически хьал меттадоаладеш бола болх дӀаболабир юрта. Из тайпара болх цига 15 шу хьалха дӀабихьабар - 2007-ча шера. Цу хана денз, кӀалха гӀоа йижа, баьцаш дӀа-хьа яьржа хин хьал дикка эшаденнад. Геттара дукха догӀаш латтача хана, хий ший бердашкара арадалар кхерам болаш да таханара цигара хьал.
«4,7 км кхоачаш моттиг я цӀенъе езар. Хин кӀалхара бӀеха хӀамаш арайоахаш, баьцаш дӀайоахаш боккха болх ба цига дӀабахьа безар. Из болх чакхбоаккхаргбола моттиг къоастаяьй карарча хана, болх дӀаболабе кийчлуш ба. Укх шера цӀенъергьяр 1 км кхоачаш моттиг я. 2027-ча шерга кхаччалца дӀахьоргья проект», - дийцар «Сердалога» Ӏалама гӀулакхех йолча министерствос.
Мехкара хиш цӀендар, цар хьал боаггӀача боараме тоадар лоархӀамеча гӀулакхех да тахан. Укх шера из тайпара болх чакхбаьккхар 3,7 км кхоачаш йола Сурхо тӀара хин моттигаш цӀенъеш, Магасера 4,6 км латта Шолж яхача хин доазув меттадоаладеш.
