«Пхьарий мохк» яха фестиваль дӀахьоргья мехка
Халкъашта юкъера «Пхьарий мохк» яха халкъа кхоллама балхий фестиваль дӀахьоргья вай мехка.
Бахархой санна, кхыча регионашкара, мехкашкара хьаьший гуллургба цу кхетаче. Фестивала йолаялар, укх бетта 28-ча дийнахьа, Мужечарча спорта кийчо еча моттиге хургда. 20 совгӀа болча вай мехкарча говзанчаша 10 тайпара, моллагӀча сага дакъа лаца йиш йола гойтама балхаш хьокхаргда цига.
Фестиваль дӀакъовлаш йола кхетаче хьатӀабоагӀача бетта 5-6-ча деношка Магасерча керттерча доазон тӀа хургья. Цига шоай говза балхаш хьокхаргда 40 пхьара, царна юкъе хургба Россе кхыча моттигашкара , кхыча мехкашкара 20 саг. Вай республика этнокультурацарча туризма моттиг хилар чӀоагӀдара тӀехьа лоархӀаме да, из фестиваль укх лаьтта дӀаяхьар, белгалдир Мехкадас.
«Тахан доаккхал де йиш йолаш да вай, укх мехка устугӀан кхаькхах, цӀоках хӀамаш хьаеш хиларах, иштта турс дуллаш, дахчан хӀамаш хьакхоллаш, топпарца , иштта кхыдарашца балхаш деш хилар. ГӀалгӀай мехкарча наха хьаеш йола хӀамаш ерригача Россе, иштта кхыдолча мехкашка а хоза хеташ, лакха мах оттабеш я», - белгалдир республикан кулгалхочо.
Мехкадас теркалдир, кхычахьара баьхкача говзанчий балхаш довзар, дӀа-хьа эцар, Ӏомадар лоархӀаме долга. Дог ураэтта, кхы а шерагӀа къахьега ловш, цӀагӀоргба аьнна хет хьатӀабаьхка хьаьший.
