Нах балха увттабу ярмарка хургья мехка
Укх бетта 27-ча дийнахьа «Росси болх. Аьттон ха» яха болх бу моттигаш Ӏалашъеш йола ярмарка дӀахьоргья мехка. Из хоам «Сердалога» бир Мехкадаь зарбан болх лелабераша. Цу кхетаче шоай дега товш йола болх бе моттигаш харжа аьттув ба наьха. Моттигера санна, берригача мехкара цӀихеза компанеш хургья ярмарке.
Къахьегама 600 моттиг хургья вайцигара, федеральни моттигашкара - 10 000. HR-говзанчашца къамаьл де, цхьацца хӀама хатта, дашха аьттув хургба доакъашхой. Ше болх беча моттиге лакхвала, йозув оттаде, иштта кхыдараш чакхдаха гӀо деш хургба ярмарке.
Тайп-тайпарча оагӀонашкарча 25 компанена хьалхалаттараш бовзаргба, царца къамаьл де йиш хургья. Иштта, тӀехьарча шерашка вай Мехкадаь чӀоагӀонца сайца латтачара юха болх дӀаболабайтача моттигашка а къахьега хьехаргба ярмарке.
«Наха къахьега моттигаш хилийтар тахан эггара лоархӀамегӀа долча декхарех да тхона. Шоай хӀама доаржаде, цхьан моттиге дӀачӀоагӀбала аьттув луш йола проекташ кхоачашъяра тӀехьа къахьег оаха. Ший моттиг хувца ловш вар, болх лохаш вар цу лоархӀамеча кхетаче дакъа лаца вех», - аьлар вай Мехкадас Келаматанаькъан Махьмуд-Ӏаьлас.
