ТӀем тӀа котало яьккха 80 шу дизара хетаяь кхетаченаш хургья
ГӀалгӀайче дӀахьоргья Сийлахь- боккхача Даьймехка тӀем тӀа котало яьккха 80 шу дизара хетаяь кхетаченаш. БӀарчча шера, республикан шахьарашка, юрташка дӀахьоргда лаьрххӀа дола вӀашагӀкхетараш, яхаш, дийцар, ГӀалгӀайчен Кулгалхочо дӀахьош хиннача моттигерча Паччахьалкхен кхетаче.
Культуран Министра Лаьнанаькъан Залинас гойтар де лерхӀарий план. Цунна чудоагӀаш да, цӀайна хетадаь концерт дӀадахьар, «ТӀема ханара иллеш. ТӀемах дола иллеш»» яха мехкашта юкъера фестиваль, «Иллеша Коталонга дигар вай!» яха республикан фестиваль, «Сийлахь-боккхача Даьймехка тӀем тӀа Котало йоаккхаш, ГӀалгӀайчено юкъедихьа дакъа» яха Ӏилман-практически конференци, «Коталонах бола дагалоаттам» яха библиотекай юкъара моттигера болам.
Цул совгӀа, спектаклаш, тематически гойтамаш дӀахьоргда, берий суртий, Сийлахь-боккхача Даьймехка тӀема книжкаш хургда цига.
Культуран моттигашка цӀайна хетадаь концерташ кийчдергда, тайп-тайпара суртий, кулгаговзала балхий гойтамаш хургда, иштта «Денала урокаш» яха Даьхенцара безам совбаккхара бола болам хургба.
Юкъара хьаийцача, 150 гаргга кхетаче дӀаяхьа лаьрхӀад, цига дакъа лоацаш хургва 10 000 саг.
Республикан Кулгалхочо Келаматанаькъан Махьмуд-Ӏаьлас теркам тӀабахийтар мехка дагалоаттама моттигашта, иштта ветеранашта, цар дезалашта новкъостал дара.
Министрий кабинета тӀадиллар, еррига вахара-административни моттигаш, цӀай хьатӀадоагӀаш, кийчъяь хилийтар.
