УнахцӀенон даькъ тӀара болх кердабаккха лаьрхӀад
ГӏалгӀайче дӀайихьар унахцӀенон даькъ тӀарча балха хетаяь кхетаче, цунна кулгал деш вар республикан хьалха латта Келаматанаькъан Махьмуд-Ӏаьла.
Теркама юкъе дар - лорий балха моттигашка нийслуш дола кхоачамбоацараш, уж дагадоахк республикан Кулгалхочунна, къаьстта уголовни гӀулакх хьаделлар цхьаболча лорашта духьала.
Мехкадас белгалдир, цун керттерча даькъах цаӀ да, унахцӀенон балха тӀа нийса леладеш цахилар лаьрххӀа йолча лорий страховане Ганза хьалаш.
«ДукхагӀа дола ахчан дакъа ФОМС ахчан тӀара хьожадеш хиларца, къаьстта 80% лорий болхлошта баьча балхах дӀалуш дола, 20% мара йисац таханарча заман оборудовани эцара, молхашца Ӏалашо яра, кхыдола лоархӀаме хьалаш леладара, из нийса дац; из, кхы тӀехьа ца доаккхаш, кхоачашде деза хаттар да», - аьлар цо.
Кхетаче дӀахьош республикан Кулгалхочо моттигерча унахцӀенон Министерствонна тӀадиллар кӀоаргга тахкар, лораша болх беча моттигий хӀара деннара расписанеш. Цо хьалхадаьккхар уж расписанеш вӀашагӀтоха, дӀадодар а долаш дар а дикагӀа довзара. Из болх дӀабахьаро административни болхлой кӀезигагӀа бергба, цар болх лорашта юкъе дӀабекъаш хиларца.
Иштта Келаматанаькъан Махьмуд-Ӏаьлас белгалдир хоамий технологеш юкъеяха езаш хилар, болх дикагӀа дӀагӀоргболаш, болхлошта кӀезигагӀа хало хургйолаш.
«Балха моттигаш сов хьалйизай, цудухьа цу тайпара хьал Ӏаткъаш да наха дарбаш деча балха даькъ тӀа, цо юхатотт таханарча заман технологеш юкъеяхар, царца дарбаш дар, лораш шоайла яхьебалара гӀулакх а юхадоаккх», - аьлар Келаматанаькъан Махьмуд-Ӏаьлас.
Цул совгӀа, цо белгалдир болхлой къахьегама боагӀаш бола мах оттабар лоархӀаме хилар, иштта ФОМСо дер гуш а дӀадода рузкъа сенга дода ховш хилар лоархӀаме долга. Из хьаллоацаш хиларо таро лургья аьнна лоархӀ ГӏалгӀайчен Кулгалхочо, унахцӀенон балха даькъ тӀа этта хьал дикка хувца.
