Шолжа бердий йистошкара бӀаь совгӀа гали нувхаш гулйир
Эбарга-Юртарча Шолжа берда йистошкара бӀаь совгӀа гали дизза нувхаш гулъеш, къахьийгар цигарча наха. «Россе хиш» яхача Ерригача Россе боламга гӀолла дӀабихьар из болх. «Сердалога» из хоам Ӏалама гӀулакхех йолча министерствос бир.
«Ӏалама гӀулакхех йолча министерствон болхлоша, иштта кхыбараша дакъа лоацаш дӀадихьар къахьегама шоатта. Шолжа берда йистош цӀенъеш, 750 метрага кхоачача доазон тӀара 119 гали нувхаш гулйир Ӏаламах дог лазараша», - йоах тхогарча хоамо.
Экологаша белгалду, из тайпара болх каст-каста ГӀажарий- Юртарча Эса моттигашка дӀакхахьа безаш хулилга. СалаӀа арабувлача хӀама бе доацараша юташ йола нувхаш галеш диззе араяха езаш хул цига а.
Даггара кхайкадеш латт мехка, Ӏалама моттигашка, хин йистошка нувхаш ма йоаржае, шоашта тӀехьа кегар буташ дӀа ма аха, яхаш; бакъда, Дала хьаденнача хозача Ӏаламах дог цалазараш, хӀама бе доацараш меттабоагӀаш бац.
«Россе хиш» яха болам вай мехка дӀахохьош ба, моллагӀа Ӏалама моттигех дог лазаш вола саг ва цу юкъе дакъа лаца йиш йолаш.
