Ӏохарцар кхерам болча цӀеношкара, нах арабоахаш программа я вай мехка дӀахьош

Ӏохарцар кхерам болаш да, аьнна, соцам баьча 26 цӀагӀара нах кхычахьа дӀачубохийташ, болх дӀабахьа лерхӀ республике. Пхи шу хиллал йолча хана, чакхдаккха лерхӀ из лоархӀаме гӀулакх. 2025 шергара 2030 шу чулоацаш, цу гӀулакха эшаш дола рузкъа лоаттадар къоабалдир федеральни Паччахьалкхено.
Пхе шера дӀахьоргйолча кердача программага гӀолла, 2017-ча шера Ӏан шоллагӀча бетта 1-ча денгара 2022-ча шера Ӏан шоллагӀча бетта 1-ча денга кхоачаш, Ӏохарцар кхерам болча цӀеношкара нах кердача гӀишлошка дӀачуухийтаргба.
Иштта дола цӀенош Магасе цаӀ да, МагӀалбике пхиъ, Шолжа шахьаре 14, пхиъ Ӏаьлий-Юрта, Сурхо тӀа, ТӀой-Юрта, Эккажкъонгий-Юрта, Яндаре.
Мехкадас Келаматанаькъан Махьмуд-Ӏаьлас белгалдир, харцар кхерам болча цӀеношка вахар геттара чӀоагӀа хьашт доацаш хӀама долга, из гӀулакх ма хулла сихагӀа тоаде дезилга. Ший вахара оагӀонашка республикан кулгалхочо яздир, 2019-ча шера денз Россе Паччахьалкхено гӀо деш, 629 саг тишача цӀеношкара араваьккхалга.