Хьунаш цӀерах лораеш, болх ба мехка дӀаболабаьр
Хьунаш цӀерах лораяра тӀагӀолла, 27 тайпара балхаш чакхдоахаш ба мехкарча хьунашка. Из хоам «Сердалога» бир Ӏалама гӀулакхех йолча министерстве.
Эшаш мел бола кхоачам кийчбаь латт карарча хана, иштта бе безача балха боарам къоастабаьб, берригача болхлошта декхараш тӀадаьхкад.
«Таханарча дийнахьа кхоачашбаь болх: цӀи яьлча хьунаш цу хатарах лораеш дола наькъаш (31 км карарча хана йистебаьккха болх - 1 км), цӀи дӀа-хьа яржаргйоацаш доаха харшаш (болх чакхбаккха беза доазув 90 км, йистедаьккхар - 3 км), уж харшаш цӀендеш, тоадеш бола болх (90 км кхоачаш, даьр - 1 км).
ЦӀи ялара кхерам бола ха чакхъяллалца дӀахьоргда цу оагӀонцара балхаш. Иштта хьунашта тӀахьожам бе яьнна вӀашагӀъеллай 11 тоаба, 280 км кхоачаш болча 22 хьун наькъага хьожаш хургья уж. Хьун моттигаш лораяр хаоттамга хьежжа хургда», - дийцар тхога цу оагӀонцарча министерствон болхлоша.
