МагӀалбика кхале хьайбаш Ӏангара дахара кийчо яьй
14.01.2025 14:23
МагӀалбика кхале экологически хьал лорадара, хьайбаш Ӏангара доахаргдолаш доакъарца кийчо яьй. Ара шелал хьаэттача, хьайбашта даа хӀама хилац, цудухьа из Ӏаткъаш хул цар унахцӀенонна, цул совгӀа, уж дов а тарлу.
Доакъар оттадеш йола хӀара моттиг белгалйоалаш я. Цо таро лу хьайбашка бӀарглакха, Ӏан замах цар хьал довза.
Белгалдаккха деза, МагӀалбика хьун доазув 53 эзар гектар лаьтта долга, царех 8 эзар гектар хьу тӀайолаш да. ХьунагӀа лела хьайбаш дукхагӀа хилийтара, лаьрххӀа дола ялат лоаттаду царна, дикагӀа дегӀадоагӀаргдолаш.
