Ӏарпенаькъан цӀерах йолча колледжа тӀабода никъ тоабе лерхӀ Наьсаре
23.01.2025 12:52
Ӏарпенаькъан Ювсапа цӀерах йолча политехнически колледжа тӀабода, дукхача хана денз тоабе безача хьале этта никъ меттабоалабе лаьрхьад. Из белгалдир шахьара дас Оздой Руслана.
Никъ тоабе аьнна хьакимга дехар даьраш ба колледжера кулгалхой, бахархой. ГӀашлой никъ цахиларах, хало ловш ба колледжа студенташ хӀара денна.
Оздой Руслана тӀадиллар, керттера никъ тоабийя, гӀаш леларашта лерттӀа никъ билла; цул совгӀа, цу моттиге остановка хьалъе, аьнна. Иштта мэра тӀадиллар, цу гонахьа бахача нахаца шоай доазув чулаьца латта карташ кӀеззига чуоза аьле, къамаьл де аьнна. ГӀашлой никъ боаггӀача боараме хургболаш де дезаш да из. Цу гӀулакха мел эшаш дола ахча хьакъоастаде лаьрхӀа ва мэр.
