ГӀалгӀайчен Парламенте дийцар, базар тӀа дохкача хӀамай дикал лакха хила езарах

ГӀалгӀай Республикан Халкъа Гулламе дӀайихьар, Пхьарчанаькъан Мухьмада кулгал а деш, Ӏалам леладарах, лаьттан политиках дола дешаш дувцаш йола йоккха кхетаче. Керттера дийцар дар, республике тахан дохкаш долча товарий дикал лакха хилийтар.
Доакъашхоша белгалдир, цу даькъ тӀа болх беш хилар. Ветеринарни урхаллен кулгалхочо Дзугаев Беслана аьнначох, мехкара дарбан хьехамаш ду кхетаченаш дӀаяхьара хьал дика латт.
Бакъда, из дувцаш, хьалхашка нийслуш долча кхоачамбоацарех а хьоахадир, къаьстта тохкама болх дӀахьоча оагӀонах.
Уж халонаш юстаръяхара дакъа юкъедахьаш хила деза муниципальни Ӏаьдал.
Парламента депутаташа иштта аьлар, дикал йоаца товараш республике ца хилийта, дукхагӀа тӀахьожама болх дӀабахьа безилга. Къаьстта теркама юкъеийцар деша даха ха йоацача берий моттигашка, дешара моттигашка кхачанна тӀахьожам лоаттабе безаш хилар.