Полиомиелита духьала маьхий тоха кийчлуш ба вай мехка
3 шергара 14 шерга кхаччалца долча берашта, полиомиелит яхача лазара духьала маьхий тохаш, болх дӀаболабергба вай мехка бӀаьсти. Хьалхарча даькъа болх бӀаьстан шоллагӀча бетта 7-ча денгара 11-ча денга кхаччалца хургба, шоллагӀбар - бӀаьстан кхоалагӀча бетта 12-ча денгара 16-ча денга кхаччалца дӀахьоргба.
Вай Мехкадас белгалдир, полиомиелито унахцӀенон доккха зе де йиш йолга, цудухьа лоархӀаме да из даржаргдоацаш маьхий тохар. «Ноаношта хьалхадаккха деза, маьхий цатохийтар мел харцахьдала йиш я берий вахаре», - аьлар Мехкадас.
Наха шоашкара дагалувцаш, доаржадеш дола бакъдоаца къамаьлаш хоададергдолаш, вакцинах дола бакъдар ма дарра дӀадовзийта деза берий ноаношта. Келаматанаькъан Махьмуд-Ӏаьлас белгалдир, кхераме йолча инфекцена духьалара болх лакхача боараме чакхбаккха безилга.
«Вай массане цхьана дӀахьоча балхаца мара юхатохалургдац кхераме лазараш, инфекцеш. Из кхетадеш хила деза деррига адам», - йоах Мехкадас, бахархой ханнахьа маьхий тохара тӀахьехаш.
