ГӀалгӀайчен полпредство хьайийллар Санкт-Петербурге
ГӀалгӀайчен полпредствон фусам хьаеллаш, кхетаче дӀайихьар Санкт-Петербурге. «Из лоархӀаме гӀулакх вай респбликанна, Россе гӀибухен оагӀонцарча столицанна юкъера бувзам чӀоагӀбеш хургда.
Белгалде деза, таханарча дийнахьа укхаза 7000 совгӀа гӀалгӀай бахилга», - аьлар вай мехкадас Келаматанаькъан Махьмуд-Ӏаьлас. ГӀалгӀайчен, Санкт-Петербурга юкъерча бувзамий исторен 100 шу совгӀа ха я. 1916-ча шера Лоаман дошлой дивизе турпалхой Петроград лораеш лаьттаб, хӀаьта XX-ча бӀаьшаре дукха гӀалгӀай деша ухаш моттиг хинний цох.
Вай къаман эггара хьалхара лор Тутайнаькъан Асият яьгӀай цига деша, цига декхараш кхоачашдеш хиннав Ленинград лораеш вахар хаьда вай эггара хьалхара лётчик Ӏоахарганаькъан Рашид-Бек. Ленинградера моастагӀа вохавеш 13 вай къаман бӀухо лаьттав. Кагирхой керда наькъаш хьаделлара тӀехьа, уж хьаллоацаш къамаьл дир Мехкадас. «Со массахана кийча ва царцарча къамаьла, цхьацца хӀама довза, Ӏомаде гӀерташ болча вай кагирхой оагӀув хьаллаца», - белгалдир республикан кулгалхочо.
Полпред волча, из проект чакхйоаккхаш къахьийгача Овшанаькъан Муслима доккха баркал аьлар Мехкадас. ГӀалгӀайчен кулгалхочо теркалдир, керда фусам мехкашта юкъера барт чӀоагӀбеш, дуккхача хӀаман аьттув луш хургхилар.
