Къахьегама шоатта дӀадихьар Алхасте
09.08.2024 21:35
Къахьегама шоатта дӀахьош хилар Алхасте баха нах. Цу беркатеча гӀулакха хьалхаэттараш бар Ӏалама гӀулакхех, экологех йолча министерствон викалаш, иштта гӀо деш лелараш. Из хоам «Сердалога» бир шоатта вӀашагӀаделлараша.
«Тайп-тайпарча моттигашкара къахьегамхой гулбелар шоатта дӀахьоча, бакъда эггара дукхагӀа цига дакъа лоацараш республикера
хьинар дараш бар. Шин сахьата къахьийга, доазон тӀа мел йола нувхаш гулъе лаьрхӀар цар», - йоах тхогарча хоамо.
«Хьинар долча тоабаца дӀахьош бола болх массахана беркате хул. Керттера декхар- Ӏалама хьал лорадар, Дала хьаеннача хозача моттигашка лостам лоаттабар. Ишттача нигатаца болабу оаха тхоай болх», - белгалдир гӀо деш леларий оагӀонна кулгал деча Галай Назира.
