Йоккхача Ачалкхе дӏаегӏар 130 га
Шоай гӏишлон доазон тӏара дӏаболабенна, ӏалама Министерствон болхлой вахара юкъейоахаш ба «Лораергья хьу», «Экологически дика хьал» яха программаш. Цу хана, ардара бетта 15-ча дийнахьа, ӏалама болхлоша шоаш болча хьалйир «баьццара карт», 100 эстей галг дӏаегӏа.
Хьун боахама, хьунашкара цӏи йоаяра центро, чарахьал дерий даькъ тӏарча наха, Магӏалбика кхален администраце, «Хьалхарчар болам» яхача отделене, Гӏалгӏайчен ӏалама Министерствон викалаша цхьана, Йоккхача Ачалкхерча кердача ишкола даькъ тӏа 130 къоахка, попа гаьнаш дӏаегӏар.
«Из болх дӏаболалуш, цкъа хьалхагӏа хьун боахама говзанчаша хӏара дӏайогӏаш йола га дӏалатаргйолаш де дезар хьалхадоаккхар гулбеннарашта. Бераш цу ишкола пенашка дийша далале, гаьнаш хоза, царца цхьана дегӏайоагӏаргья, салаӏа а ловзараш дӏадахьа а таро йолаш ӏи дергда», - аьлар «Сердало» газетага ӏалам лорадераша.
Белгалду, Гӏалгӏайче дика дакъа лоацаш я укх ворхӏ шера, «Лораергья хьу» яхача ерригроссийски боламе.
