Шолжерча Ӏам чура хий хувцара тӀахьожам лоаттабу болхлоша
02.05.2024 09:36
Шахьарерча Ӏама доал деш, цун хьал теркалдеш, хан-ханнахьа боагӀаш бола болх дӀакхухь Шолжерча цу гӀулакхах бехктокхамеча наха. Из хоам «Сердало» газетага бир шахьарерча администраце.
«Керттера декхар - Ӏама эшаш дола доал деш, цу чура хий цӀена лоаттадар. ЛаьрхӀа цу гӀулакха эшаш йола машин оттаяь, цу чура лаьтта, ца эша хӀамаш дӀайоахаш болх дӀахьош латт. Из болх йистебаьлча, хина хьачуда никъ хьабелларгба Ӏам чу», - йоах хоамо.
Нагахьа цхьа цӀаьхха хий айденна хатар хуле, гонахьара моттигаш хин кӀалха ца яхийтара юкъе доккха дакъа лоацаргда цу Ӏамо, Дала аьннадале. БӀаьстан-ахкан ханашка, чӀоагӀа бӀарг тӀаотташ, хоза хул Ӏам болча; бахархой, хьаьший тӀалатташ беркате моттиг хул цох.
