Мехкада даькъала вувцаш ба республикера бахархой, цун 66 шу дизарца
Ший 66 шу дизар дездеш вар селхан вай Мехкада Келаматанаькъан Махьмуд-Ӏаьла. 1959-ча шера бӀаьстан шоллагӀча бетта 9-ча дийнахьа ваьв вай Мехкада, Казахстанерча Алма-Атински областа Каскеленски кхален Чамалган оалача юрта.
Еррига республика - паччахьалкхен моттигаш, новкъостий, безараш, бовзараш, иштта кхыча мехкашкара нах Мехкада иразе, беркате ваха даькъала вувцаш ба тахан. Кхувш воагӀача хана денз, къахьегама, массахана цхьацца хӀама довзара тӀера волаш хьавенав мехка Кулгалхо.
2019-ча шера РФ Президента Путин Владимира вай мехка доал де оттавир из. Мехка да хиннача дийнахьа денз, къаман вахар тоаде гӀерташ, республика дегӀайоалаеш дола наькъаш хьаделлаш хьавоагӀа цун Кулгалхо.
Мехкара бахархой из деррига гуш, дика кхетадеш, хам беш ба. Къаман экономически, иштта кхыдолча оагӀонашцара хьал тоадара тӀехьа бехктокхаме, боаггӀача боараме, хьинаре къахьегаргдола тоаба вӀашагӀъеллай цо шийна гонахьа.
Тахан вайна массанена гуш да, промышленность, юртбоахама хьал, наькъаш, туризмаца дувзаденнараш, инвестораш тӀахьехаш бола болх, тайп-тайпара проекташ йоаржаяр лакхача боараме дӀахьош долга. Зе хала дац СВО доакъашхошта, цар дезалашта Мехкадас мел боккха теркам бу.
Иштта керда наькъаш хьаделлаш болх дӀаболабайтаб цо кагирхой вахар тоадара оагӀонца. Хьалкхувш латтача тӀехьен хьалха ца хинна аьттув ба тахан, дуккхача хӀаман тӀехьа.
Белгалде деза, вай Мехкада РФ Президента Путин Владимира лоархӀаш, оагӀув хьаллоацаш волга. Из деррига а ГӀалгӀай мехках дог лазаш, наьха хьашташ теркалдеш, царна дезар, эшар фуд кхетадеш хиларца дувзаденна да. Карарча хана кхоачашдаьр кӀезига дац, бакъда дукха да дӀахойодача хана де лерхӀар.
«Сердало» яхача кепайоазон цӀен болхлоша боккхача лерхӀамца даькъалавувц Келаматанаькъан Махьмуд-Ӏаьла ваьча денца! ЛоархӀаме Мехкада, могаш волаш, иразе вахалва хьо тхона дуккхача шерашка!
