Илдарха-ГӀалан 18 сага гӀо дир Ӏаьдало
10.02.2026 16:40
Илдарха-Гӏалан 18 сага ахчанца гӀо дир шахьара Ӏаьдало. Цу тайпара гӏулакх кхоачашде лаьрхӀар вахара-лелара комиссе карарча шера хьалхара дӀахьош хиннача кхетаче.
«Кхетаче дӀахьош, шахьара кулгалхочун гӏончас Йовлой Тимура ший новкъосташца техкар, доал деча даькъ тӀарча 18 вахархочун дехараш. Царех 9 ахчанцара гӀо дехаш дар, арахьа дарба де баха везаш хиларца дувзаденна, 6 - дукха дарба деш хиларах молхаш эца гӀо дехаш, 3 - халача хьалашка боахкача дезалашта новкъостал дар дехаш. Кхадж тесса, комиссе доакъашхоша лаьрхӀар царна гӀо де», - аьлар мэре зарбан болх лелабеча Кхорахой Мурада.
