Къайлагӏа наьха цӏерах ахчаш ийдеш хиннав, 19 шу даьнна банка болхло
Наьха цӏерах къайлагӏа кредиташ доахаш, болх дӏахьош хинна Пригородни кхалера 19 шу даьнна вахархо дӏалаьцар мехкарча полице болхлоша. Кхыча мехкарча воккхагӏа волча, из тайпара болх лелабеш хиннача сага хьалхадаьккхад цунна из зулам. Наьха паспорташта, анкеташта тӏакхача аьттув хургболаш, лаьрххӏа банке балха эттав из саг. Цига латтача наьха каьхаташта тӏакхача аьттув хиларах, ше мо волча зуламхочунца бахархой цӏерах къайлагӏа, тайп-тайпарча боарамах кредиташ доахаш хиннав из. Шолжа кхален полице болхлой къахьегаш ба из гӏулакх ма дарра тохкаш, цу тийшача балха юкъе нийсбеннараш мел нах ба гучадоаккхаш. «Сердалога» из хоам бера Россе вай мехкарча МВД болхлошкара.
«Шоай цӏерах малашб ца ховча наха кредиташ ийдаьд, яхаш, МВД латкъа ихарий ларах болх дӏабихьача; МВД «Шолжа кхала» яхача МО болхлоша, хьалеха, ӏочувоалавир 19 шу даьнна мехкахо. ӏаьдала гучаваьннилга хайча, ше дари даьд цо. Хьаийдаь кредиташ шоллагӏа волча зуламхочунца шоай дега ма тов дохкаш хиннад цар.
6 сага цӏерах кредиташ ийцалга гучадаьннад МВД болхлошта карарча хана. Царна юкъерча шиннех гӏулакх хьадийллад полице. Цхьан сага цӏерах 16 000 сом ийцад цар, шоллагӏча сага цӏерах – 5600 сом», - йоах «Сердалога» МВД бенача хоамо.
Мехкара аравала йиш йоацаш, бокъо йийхка ва из саг карарча хана. Деррига хӏама тохкаш болх чакхбаьккха баллалца, цхьаннахьа ваха йиш йолаш вац аттача ахчанца вӏаьхий хила гӏийртар. Цул совгӏа, цунца цхьана из тийшаболх кхестабаь, тахан ӏаьдалах лечкъаш лела шоллагӏа вола зуламхо лохаш, къахьегаш да ӏаьдал.
